Ambaliya ta sa ’yan majalisar Kogi hijira daga gidajensu

Ambaliya ta mamaye ilahirin unguwar ’yan Majalisar Dokoki ta Jihar Kogi tare da tilasta wasunsu yin kaura.

Ambaliya da aka samu a Jihar ta mamaye wasu manyan hanyoyin, lamarin da ya hana yiwuwar tafiye-tafiye zuwa wasu sassan jihar.

• Ambaliya ta hallaka mutum 25 a Bauchi
• Ambaliya: Sama da mutum 50,000 sun rasa muhallansu a Kogi

Unguwar da ke kan hanyar kauyen Ganaja na dauke da gidajen ’yan majalisa guda 26, in banda yanzu da ambaliyar ta tilasta wa mazaunanta yin kaura.

Rahotanni sun ce zuwa ranar Lahadi, ba a iya zuwa kauyen na Ganaja dole sai an yi amfani da kwalekwale.

Hakan ya tilasta wa matafiya sauya hanya domin zuwa Lokoja, babban birnin jihar.

Akalla gidajen ’yan majalisa takwas ne ba za su shigu ba sakamakon iftila’in.

Dukkannin yunkurin jin ta bakin ’yan majalisar ya ci tura saboda dukkanninsu sun ki cewa uffan.