✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto

Amotekun za ta fara amfani da kudan-zuma da macizai wajen yaki da ta’ddanci a Oyo

Za a rika amfani da namun daji wajen yaki da ’yan ta’adda maimakon makaman zamani

Shugaban Hukumar Tsaro ta Amotekun a Jihar Oyo, Janar Kunle Togun (mai ritaya), ya ce akwai yiwuwar su yi amfani da kudan-zuma da macizai masu dafi domin yaki da ’yan ta’adda a jihar.

Ya ce lokaci ya yi da za su rika yin amfani da namun daji wajen yaki da ’yan ta’adda maimakon manyan makaman zamani.

Janar Togun ya fadi haka ne a wajen taron da kungiyar Oke-Ogun Debelopment Consultatibe Forum (ODCF), ta shirya a garin Otu a karamar Hukumar Itesiwaju a Jihar Oyo.

Ya ce, ya yi tafiye-tafiye zuwa kasashen duniya daban-daban ya gane wa idanunsa yadda mafarauta suke amfani da namun daji wajen yakar ayyukan ta’ddanci.

Ya nuna mamakin kan yadda mahukunta a Najeriya a lokacin yaki da cutar Kwarona suka kyale wasu ’yan ta’adda suka dinga shigowa cikin kasa daga wasu makwabtan kasashe a inda suka rika yin ayyukan ta’ddanci babu kakkautawa.

“Jihar Oyo ce kan gaba da irin wadannan ’yan ta’adda da suka shigo saboda samun kungurmin daji cikin makeken fili a yankin Oke-Ogun da ke iyaka da kasar Benin da suna buya,” inji shi.

Ya yi kira ga Gwamnatin Tarayya ta kyale jami’an hukumar Amotekun su yi amfani da bindiga kirar AK-47 da sauran manyan makamai don gudanar da ayyukan tsaron kasa a yankin Kudu maso Yamma.

Ya ce matsalar tsaro a fadin Najeriya na ci gaba da zama babbar barazana, lamarin da ya sa dimbin mutane rasa rayukansu da dukiyoyi a sassan kasar nan.