Dakarun Operation “Hadin Kai” tare da hadin gwiwar ’yan banga sun cafke wanda ake zargi da yi wa kungiyar Boko Haram safarar kayan amfanin yau da kullum a garin Kurkareta da ke Jihar Yobe.
Hakan na dauke ne cikin wata sanarwar da Daraktan Yada Labaran Sojin, Brigediya Mohammed Yerima, ya fitar a ranar Laraba a Abuja.
- Europa: An kai wa magoya bayan Man U hari a Poland
- Hisbah ta kwace kwalaben giya 8,400 a Kano
- Taskun da Ibo Musulmi ke shiga
“Dukkannin kayan da aka samu daga wajen wanda ake zargin mun ajiye su a wajenmu don fadada bincike, kafin mika su ga hukumomin da suka dace.
“Rundunar Soji ta yi nasarar dakile yunkurin kai hare-hare a yankin.
“Muna tabbatar wa jama’a cewa za mu ci gaba da kare rayukansu da dukiyoyinsu daga ’yan ta’adda, ’yan bindiga da sauran bata-gari a yankin Arewa-maso-Gabas da ma kasa baki daya,” kamar yadda ya bayyana.
Yerima ya kara da cewar an samu manya-manyan duro guda 62 cike da man fetur da aka boye a gidaje da shaguna daban-daban.
Kazalika an kwato motoci uku wadanda ake zargin da su yake safarar kayayyaki ga Boko Haram a jihar.
Yerima, ya kara da cewa samamen nasu ya yi nasara ne bayan samun bayanai daga wasu mutane kan wanda ake zargin.
