Rahotanni sun ce wata kotu a Kasar Morocco ta yanke wa wata mata ’yar kasar amma asalin Italiya hukuncin daurin shekaru uku da rabi a gidan yari.
Wannan hukunci na zuwa ne bayan samun matar da cin mutuncin addinin Islama cikin wani sako da ta wallafa a shafinta na Facebook da ke izgili ta hanyar kwaikwayon ayar Al Kur’ani.
Mahaifin matar mai shekara 23, ya ce an kama ta a filin jirgin sama na Rabat, babban birnin kasar, lokacin da take sauka daga Faransa inda take karatu.
Sashen Hausa na BBC ya ruwaito cewa, wata kungiyar addini a Marrakesh ce ta kai karar ta ga hukumomi wanda har ya kai ga yanke mata hukuncin.
