An cafke wasu ‘yan kasuwa su uku a Jihar Kaduna bayan an same su suna sayar da wasu jakunkunan makaranta wanda Bankin Duniya ya bayar a matsayin gudunmawa ga Gwamnatin Jihar.
Bankin na Duniya ya bai wa Gwamnatin Kaduna jakunkunan ne karkashin shirinsa na bunkasa sha’anin ilimi (BESDA) don raba wa daliban firamare kyauta a jihar.
- ASUU za ta maka gwamnati a kotu kan yanke albashi
- An yi sulhu tsakanin Alhassan Doguwa da Murtala Garo
Tuni aka maka wadanda ake zargin a kotun majistare bisa tuhumar sata da kuma sayen kayan sata.
Bayanan da kotun ta samu sun nuna an kama daya daga cikin wadanda ake zargin yana sayar da jakar a watan Agusta a yankin Sabon Tasha cikin Karamar Hukumar Zangon Kataf da ke jihar.
An same su ne suna sayar da jakunkunan a kan farashi tsakanin N1,500 zuwa N1,700 kowacce.
Daga bisani, kotun ta dage ci gaba da shari’ar zuwa ranar 28 ga Nuwamban 2022.
Sau da yawa, akan fuskanci irin wannan matsalar a cikin al’umma, inda kayayyakin tallafi da akan bayar don raba wa jama’a kyauta ba su isa gare su, ko kuma a sayar musu maimakon kyauta.
(NAN)
