Majalisar Gudanarwa ta Hukumar Shirya Jarrabawa a Najeriya NECO, ta amince da nadin Mista Ebikibina John Ogborodi a matsayin Mukaddashin Shugaban hukumar.
Hakan na zuwa ne bayan kwana hudu da mutuwar Shugaban Hukumar, Farfesa Godswill Obioma kamar yadda Kakakinta, Mista Azeez ya sanar.
- JAMB ta dora laifin kashi 80% na matsalar rijista kan dalibai
- Dubun manomin da ya zuba guba a rijiyoyi 9 ta cika
Kafin nadin nasa, Mista Ogborodi shi ne Daraktan Ayyuka na Musamman a Hukumar.
Mista Ogborodi wanda dan asalin Karamar Hukumar Sagbama ta Jihar Bayelsa ce, ya fara aiki da NECO a 1999 inda ya rike mukamai daban daban.
Ya yi Digiri na farko a Jami’ar Jos a shekarar 1986 sai kuma na biyu a wannan jami’a a shekarar 1999.
Aminiya ta ruwaito cewa, a ranar Litinin da ta gabata ce Farfesa Godswill Obioma ya koma ga Mahaliccinsa bayan ya sha fama da gajeriyar jinya.
