An gudanar da jana’izar mutum 15 da suka rasu a wata gobara da ta tashi a gundumar Bronx da ke birnin New York a makon da ya gabata, wadda ta hallaka mutum 17 ciki har da kananan yara takwas.
Gwamnatin Jihar New York ta ware Dala miliyan biyu ta kafa gidauniyar bayar da diyya ga wadanda wannan balai’i ya rutsa da su.
- ’Yan bindiga sun je daukar fansa kan mayakan Boko Haram a Birnin Gwari
- Buhari ga sojoji: Ku hanzarta murkushe ’yan bindigar Neja
Mataimakin Gwamnan jihar, Brian Benjamin, ya samu halartar jana’izar tare da Magajin Garin, New York, Eric Adams da Shugaban Masu Rinjayi a Majalisar Dattawar Amurka, Chuck Schummer.
Daruruwan mutane daga sassa daban-daban na gudumar Bronx da ma New York baki daya, musamman Musulmi ne suka halarci Sallar Jana’izar ta mutum 15 a ranar Lahadi a cikin yanayi mai tsananin sanyi.
Muryar Amurka ta ruwaito cewa, mutanen da suka halarci jana’izar sun bayyana matukar bakin ciki da alhini na rashin ’yan uwansu ’yan Afirka wadanda kusan dukkansu ’yan kasar Gambiya ne.
Antoni-Janar na New York, Leticia James, ta lashi takobi cewa hukumarta za ta yi iya bakin kokarinta ta tabbatar da an gurfanar da duk wani mai laifi a wannan gobara da ta tashi, wanda jami’ai suka ce injin dumama gida da wata kofar da ta lalace aka bar ta a sake ne suka haddasa gobarar.
Mataimakin Gwamnan Jihar New York, Brian Benjamin, da ya wakilici gwamnar, ya ce, “Muna tabbatar wa iyalai da suke nan da ma waje cewa Bronx na cikin Jihar New York kuma za mu kasance tare mu tabbatar wannan bala’i bai sake faruwa ba.
“Shi ma Shugaban Majalisar Dattawa, Chuck Shummer, zai yi duk iya kokarinsa a matsayi na tarayya a taimaka wa iyalai,” inda ya ce sun bukaci Ofishin Jakadancin Amurka a Gambiya da ya daina aiki saboda annobar COVID-19.
