Daruruwan magoya bayan Jam’iyyar PDP ne suka sauya sheka zuwa APC a Katsina.
Daraktan Yada Labaran Kwamitin Yakin Neman Zaben APC na jihar, Ahmad Abdulkadir ne ya bayyana hakan a Katsina.
Abdulkadir ya ce shugaban jam’iyyar ne ya karbi magoya bayan yayin taron yakin neman zaben dan takara Gwamnan Katsina na APC Dikko Radda a Mashi.
“Ya zuwa yanzu dan takarar ya ziyarci kananan hukumomi shida daga cikin 12 da ke mazabar Katsina ta Arewa. Ya kuma ziyarci unguwanni sama da 60 a yankunan shida.
“A Daura kuma, ya ziyarci Shugaban Kasa inda ya shaida masa dalilin kai ziyarar, da nufin gane wa idonsa halin da mutane ke ciki da nufin samun bayanai a kai a kai kan inda za a bukaci kulawar sa idan ya zama Gwamna”, in ji shi.
Ya kuma ce Buhari ya yaba da kokarinsa tare da nuna kwarin gwiwar cewa zai lashe zaben Gwamnan jihar.
