Dan wasan gaban kungiyar Manchester City, Sergio Kun Aguero, ya koma Barcelona inda zai ci gaba da taka leda a kakar wasanni mai zuwa.
Dan wasan na Kasar Argentina ya rattaba hannu kan yarjeneniyar zama a kungiyar na shekara biyu bayan gwajin tabbatar da koshin lafiyarsa da aka gudanar ranar Litinin a Camp Nou.
Kungiyar Barcelona ce ta tabbatar da hakan cikin sako da ta wallafa a shafinta na Twitter ranar Litinin.
A sakon da Barcelona ta wallafa ta rubuta sunan Aguero tare da wallafa hotonsa sanye da rigar kungiyar.
Aguero mai shekara 32 wanda ya shafe tsawon shekara 10 yana murza leda a Manchester City ya koma Barcelona ne kyauta.
Barcelona ta yi zawarcin dan wasan ne bayan da kwantaraginsa a Manchester City ya kare kuma ya yanke shawarar ba zai sabunta yarjejeniyar ci gaba da zama a kungiyar ba.
