Shugaba Muhammadu Buhari ya yi wa Babban Hafsan Sojan Kasan Najeriya, Manjo Janar Farouk Yahaya, kwalliyar anini a safiyar Laraba.
Buhari tare da Mataimakinsa, Farfesa Yemi Osinbajo, sun lika masa aninin ne a Fadar Shugaban Kasa da ke Abuja, babban birnin kasar.
Rahotanni sun bayyana cewa, bayan kammala kwalliyar ce kuma Shugaba Buhari ya jagoranci zaman Majalisar Zartarwa wanda aka saba gudanarwa duk Laraba.
Tun a watan Mayun da ya gabata ne Buhari ya nada Janar Farouk a matsayin jagoran rundunar sojan kasa.
Hakan na zuwa ne bayan ’yan kwanaki da rasuwa wanda ya gada, Laftanar-Janar Ibrahim Attahiru, ya rasu a wani hatsarin jirgin sama a Jihar Kaduna.
