Dan Wasan Kwallon Kafar Najeriya, Abdullahi Shehu mai taka leda a kungiyar Omonia Nicosia da ke kasar Cyprus, ya auri jarumar Kannywood a ranar Juma’a.
Dan wasan dai ya auri jarumar fina-finan Hausa ta Kannywood, Naja’atu Muhammad Suleiman wacce aka fi sani da Murjanatu ’Yar Baba.
An daura auren dan wasan da jarumar a masallacin Umar Bin Kattab da ke cikin birnin Kano bayan idar da sallar Juma’a, kuma an biya N50,000 a matsayin sadaki.
Naja’atu ta fara fitowa a fina-finan Hausa tun tana da shekara 10 a duniya.
Ta fito a cikin fina-finai da suka hada da ‘Harira’, ‘Hakkin rai’, ‘Auren gaja’ da dai sauransu.
Dubban mutane ne suka sami halartar daurin auren dan wasan, ciki har da dan wasan gaba na Najeriya, Ahmed Musa.
