✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Elon Musk ya yi barazanar fasa sayen Twitter

Ya ce matukar ba a daddale bayanan ba, cinkin zai iya tashi

Attajiin nan da duniya, Elon Musk, ya yi barazanar fasa cinikin shafin sada zumunta na Twitter wanda ya saya a kan Dalar Amurka biliyan 44 saboda gaza ba shi wasu muhimman bayanai.

A wata wasika da lauyoyinsa suka fitar a ranar Litinin, attajirin ya ce matukar ba a ba shi wasu cikakkun bayanai kan shafukan bogi da ke dandalin ba, akwai yiwuwar cinkin ya sami matsala.

Hakan dai a cewarsa ya saba da yarjejeniyar da suka kulla da su tun a farko.

“Wannan karara ya saba da matsayar da muka cim ma da su ta samar da bayanai ba tare da kumbiya-kumbiya ba,” inji shi.

Sai dai kamfanin na Twitter a cikin wata sanarwa ranar Litinin ya ce yana fatan ganin cinikin ya kammala a kan farashin da aka amince tun da farko.

A watan Afrilun 2022 ne Hukumar Gudanarwar Twitter ta amince da murya daya ta sayar wa Elon Musk dandalin, ko da yake yarjejeniyar ta bukaci amincewar masu hannun jari a kamfanin.

A wata sanarwa yayin sayen kamfanin dai, Elon Musk ya ce dakatar da amfani da shafukan bogi ne zai kasance cikin manyan abubuwan da zai fi mayar da hankali a kan su da zarar cinikin ya fada.

Sai dai a watan da ya gabata, attajirin ya sanar da jinkirta kammala cinikin har sai an daddale batun.