Wata giwa ta kashe wata mata mai shekara 70 sannan ta je ta tattake gawarta a yayin jana’izarta.
Giwar ta tsere bayan ta yi wa matar mai suna Maya Murmu aika-aika a lokacin da take tara ruwa a kauyen Raipal da ke Gabashin Indiya, inji ’yan sanda.
- Yadda za a magance sanko
- JIBWIS ta tara miliyan 100 daga fatun layyar da aka ba ta — Sheikh Bala Lau
Matar ta rasu a asibiti sakamakon raunukan da giwar ta yi mata.
Haka kuma, a yayin jana’izar marigayiyar a yammacin ranar, sai giwar ta je ta tattake gawarta a daidai lokacin da danginta sukejana’izar marigayiyar, kamar yadda jaridar Press Trust of India ta ruwaito.
Giwar na tafiya sai ’yan uwan matar suka ci gaba da jana’izar. Bayanai sun ce, bayan giwar ta aikata hakan sai ta tsere daga gidan namun daji na Dalma da ke garin Mayurbhanj mai nisan kilomita 200 a cewar rahotanni.
A watan Okotban bara ma an samu rahoton wata giwa ta tattake wani tsoho mai yawon bude-ido, inda ta kashe shi a gaban dansa a kasar Zimbabwe.
Giwar ta kashe tsohon mai suna Michael Walsh, mai shekara 71 da yake tare da dansa mai shekara 41, lokacin da suke tafiya da safe a dajin yankin da aka killace namun daji na Mana Pools National Park.
Suna da nisan mil 40 da motarsu, lokacin da giwar ta kai wa Mista Walsh hari. Kakakin Gandun Dajin Mana Pools National Park, Mista Tinashe Farawo ya ce: ‘dan marigayin yana gani giwar ta kashe mahaifinsa.”
Mista Walsh, wanda likitan dabbobi ne daga Cape Town da ke Afirka ta Kudu, wanda ya je yawon bude-idon da ya saba a Mana Pool.
Ya rasu ne bayan shekara 35 da kwanaki bayan wata giwa ta tattake wani shugaban mafarauta a yankin bictoria Falls da ke Yammacin Zimbabwe.
Hukumomin Kula da Yawon Shakatawa a Zimbabwe da kungiyoyin kare muhalli suna ci gaba da ba da rahotannin karuwar rikici a tsakanin mutane da namun daji a ’yan shekarun nan.
Bisa kididdigar Gidauniyar Kula da Namun Daji ta Duniya, giwaye suna kashe mutane 100 zuwa 300 a kowace shekara a Indiya (WWF).
Kalaman wasu game da abin giwar ta yi Wasu masu amfani da shafin Twitter sun yi tsokaci tare da tambaya game da ainihin abin da matar ta yi wa giwar har ta bi ta wajen jana’izarta ta tattake gawarta.
Amsar da wasu masu martani ke bayyanawa a shafukan Twitter da Tik Tok ita ce, kila matar ta yi yunkurin farautar ’yar giwar ce ko yunkurin kashe jaririyar giwar tare da korar uwar.
A cewar wasu masu amfani da shafukan Intanet, ba a samu shaidar cewa giwar ta kashe matar ce saboda tana yunkurin kashe mata ‘ya ba.
Wasu rahotanni sun ce, Murmu ta je dibar ruwa ne a kauyen Raipai da ke kusa da Gidan Adana Namun Daji na Dalma na Wildlife Sanctuary, sai aka ji kukan matar.
Da aka je sai aka samu ta raunana ta kamar yadda jaridar The Times of India ta ruwaito. Matar ta yi yunkurin guje wa giwar, amma hakan ya ci tura.
Mutanen kauyen sun yi ynkurin ceto ta, daga bisani aka sanar da rasuwarta a asibiti.
A ranar da ta rasu mutanen kauyen sun yi shirin jana’izarta, sai giwar da ‘yan uwanta giwaye 11 suka fito daga dajin, inda suka lalata gidaje uku a kauyen, sannan suka tattake gawar Murmu. “Akalla mutum 1,144 ne dabbobin dawa suka kashe a tsakanin watan Afrilu 2014 zuwa Mayun, 2017. Mutune 1,052 daga cikinsu giwaye ne suka kashe su,” inji jaridar Guardian ta Ingila.
