Rahotanni sun bayyana cewa hatsarin kwale-kwale ya yi ajalin mutum 4 ’yan gida daya a Jihar Kebbi.
Hukumomi da mazauna yankin sun ce wadanda hatsarin ya rutsa da su suna hanyarsu ta zuwa gona tsallaken rafi ne.
- ’Yan gaban goshin Buhari a zaben shugabannin APC
- Farashin danyen mai ya kara tashi a kasuwannin duniya
Bayanai sun ce kwale-kwalen ya kife a ranar Laraba a yankin Yauri sakamakon iska mai karfin gaske.
BBC ya ruwaito cewa mutum shida ne ke cikin kwale-kwalen, wani uba Musa Labaran da ’ya’yansa.
Musa Labaran ya bayyana cewa an samu gawar ’ya’yansa hudu yayin da ake ci gaba da neman gawar mutum na biyar da ba a gani ba.
Ana iya tuna cewa a watan Mayun shekarar da ta gabata, sama da mutum 100 ne suka nutse a ruwa lokacin da kwale-kwalen da suke ciki ya kife a Jihar Kebbi.
Haka kum a cikin watan Disamba kimanin mutum 30 suka mutu a wani hatsari makamancin haka a Jihar Kano.
Ana danganta irin wannan al’amari ne da yadda ake loda wa kwale-kwale kaya da mutane da suka wuce kima da rashin kula da jiragen na ruwa da kuma rashin kyawun yanayi.
