Hukumar Kiyaye Hadurra ta Kasa (FRSC) ta yi gargadi ga iyaye da masu motocin haya kan sanya kananan yara ’yan kasa da shekara 12 a gaban mota.
Kwamandan Hukumar, Reshen Jihar Ondo, Uche Chukwurah ta ce ta bayyana cewa sanya yaran da ba su kai shekara 12 ba a gaban mota ya saba wa doka.
- Jonathan zai iya sake tsayawa takarar Shugaban Kasa a 2023 — Kotu
- 2023: Tsohon Babban Hafsan Sojin Sama ne zai yi wa APC takarar Gwamna a Bauchi
Ta yi karin haske da cewa a duk lokacin da aka samu hatsarin mota, kananan yara da ke gidan gaba za su iya fadawa waje ta tagar motar.
Kwamanda Uche Chukwurah ta ce a don haka, sanya su a kujerar bayan mota shi ya fi, domin kare lafiyarsu da rayukansu.
Ta bayyana haka ne a jawabinta na bikin Ranar Yara ta Duniya da rundunar ta shirya a ofishinta da ke Eleyele da ke Ibadan, babban birnin Jihar Oyo.
Bikin na Ranar Yara ta Duniya dai ana gudanar da shi ne a duk ranar 27 ga watan Mayu, kuma taken bikin na bana shi ne “Shiryawa Kowanne Yaro Kyakkyawar Makoma”.
