Hotuna: Gobarar tankar mai a kan gada ta haddasa cunkoso na awanni a hanyar Legas

Gobara ta tashi bayan wata tankar mai ta gogi wata babbar motar dakon kaya ta kamfanin Dangote inda nan take suka kama da wuta, a kan gadar da ke babbar hanyar Legas zuwa Ibadan da tsakar dare.

Hatsarin ya haddasa gagarumin cunkosu a hanyar wadda ta ita ake safarar daukacin kayayyakin masarufi daga gabar ruwa a Legas zuwa sassan Najeriya, kuma ita ce kadai mahadar Legas da sassan Najeriya.

Zuwa lokacin hada wannan rahoto ‘yan kwana-kwana da sauran jami’an kare hadura na kokarin kashe wutar wadda ta yi sama da awa bakwai tana ci, ko da yake ba a samu asarar rai ba. Wani shaida ya tabbatar wa Aminiya cewa ‘yan kwana-kwana sun yi kokari ta yadda wutar tankar ta tsaya ga manyan motocin biyu.

“Akwai karin wata motar tanka dauke da mai da ba ta kama da wuta ba, ita ake ta kokarin zuba wa ruwa domin gudun kada wuta ya tashi a kanta”, inji shi.

Ko wace hanya za a bi don magance gobarar motocin mai?

Ga wasu hotunan abin da ke faruwa da Aminiya ta samo.

Wani jami’in kashe gobara na jihar Legas a tsaye yana kallon yadda gobarar ke tashi daga tankar man

Motar dakon man fetur da ta kama da wuta a kan doguwar gada da ke hanyar Legas daga Ibadan

Babbar hanyar Legas daga Ibadan ta kasance cike da cinkoson ababen hawa bayan tashin gobarar

Nan ma wani jami’in kashe gobara ne a lokacin da suke kokarin kashe wutar

Sashen motar dakon man fetur din da ta kama da wuta

Jami’in kashe gobara yana nuni da inda wutar ke tashi. (Hotuna daga Oluwafemi Dawodu).

Jama’a sun yi cincirindo suna kallon yadda ake kokarin kashe wutar