Dan wasan tsakiya na Real Madrid, Toni Kroos, ya kwance wa gasar Firimiyar Ingila da ’yan wasanta zani a kasuwa.
Kroos mai shekaru 32 ya ce galibi ’yan kwallo na koma wa kungiyoyin Firimiyar Ingilan ce saboda neman albashi mai tsoka a madadin neman samun nasarori a fagen sana’ar tamaula.
- Nan da Disamba za mu murkushe ayyukan ta’addanci —Gwamnati
- Yadda ambaliyar ruwa ta hana mayakan Boko Haram sakat
Wannan na zuwa ne a matsayin martani ga masu ruwa da tsaki na Firimiyar da ke ganin cewa gasar ce a sahu na gaba ta fuskar daukar hankali da kuma kwarewa.
Toni Kroos ya ce kungiyoyin Ingila ba sa wani abun zo a gani a manyan gasanni kamar Kofin Zakarun Turai duk da irin makudan kudi da kungiyoyin suke batarwa wajen sayen ’yan kwallo, musamman ma a kasuwar hada-hadar ’yan wasan ta bana da aka rufe a makon jiya.
A zantarwarsa da tashar OMR, Kroos ya ce, “kudaden da ake samu ta hanyar haska wasannin Firimiyar Ingila ya fi na kowace gasa a shekarun nan, amma hakan bai sa kungiyoyinsu sun iya lashe dukkanin gasannin da suke bugawa ba.
“Tabbas ba duk ’yan kwallon da ke buga wa a Ingila ne suka sa kwadayin albashin mai tsoka ba, domin akwai wadanda samun nasara da lashe kofuna da kuma kara kwarewa a fagen tamaula suka sa a gaba,” a cewarsa.
Kroos yana cikin ’yan kwallon da suka buga wa kungiyar Real Madrid a wasan karshe na Kofin Zakarun Turai da suka lallasa Liverpool a kakar da ta wuce, inda ya lashe kofin karo na biyar a tarihinsa.
Babu shakka dai kungiyoyin Firimiyar Ingila sun sake kafa tarihi a kasuwar hada-hadar ’yan kwallo da aka rufe kwanan nan, inda sun kashe kimanin fam biliyan 1.9 (£1.9bn) wajen cefanen ’yan wasa a bana.
Wannan ya nuna sun goge tarihin da suka kafa na kashe fam biliyan 1.4 (£1.4bn) wajen sayen ’yan wasa a 2017.
Alkaluma sun nuna kungiyoyin Ingila sun kashe kudi fiye da abin da aka kashe wajen sayen ’yan wasa a sauran manyan gasannin Turai da suka hada da La Liga ta Sfaniya da Serie A ta Italiya da kuma Bundesliga da ake bugawa a Jamus.
