Kungiyar Malaman Jami’a ta Kasa (ASUU), ta ce nan ba da jimawa ba za su janye yajin aikin da suka yi wata takwas suna yi.
Da yake magana a tattauna da Majalisar Wakilai kan daidaita kungiyar da Gwamnatin Tarayya, Shugaban ASUU na Ƙasa, Farfesa Emmanuel Esodeke, ya ce bisa dukkan alamu, yajin aikin ya zo karshe.
“Muna so a samar da kyakkyawan tsarin albashi ta yadda malamai daga ko’ina a fadin duniya za su rika kwadayin zuwa koyarwa a jami’o’in kasar nan,” in ji Farfesa Osodeke.
A lokacin ganawar tasu ranar Litinin da shugabannin Majalisar Wakilai a Abuja, Farfesa Emmanuel Esodeke ya ce daga abin da kungiyar ta gani a wurin taron, akwai alamun nasara.
Ya ce, “Muna fata a wannan karon ba za a samu wasu mutane ko kungiya da za su haifar da abubuwan da za su sa kungiyar ta shiga cikin wani mawuyacin hali ba.”
Ya kuma yi fatan shiga tsakani da shugabannin Majalisar suka yi shi ne na karshe saboda dalibai su koma aji.
Ya kara da cewa fafutukar ASUU tana yi ne domin ceto bangaren ilimi da jami’o’in kasar nan.
Ya ce ya kamata kuma a rika biyan jami’o’in Najeriya da kudi mai kauri domin jawo hankalin daliban kasashen waje, yayin da ya nuna damuwa kan wasu nagartattun malamai da ke barin kasar.
Ya ci gaba da cewa, “Muna godiya ga Shugaban Majalisar kan wannan shiga tsakani kuma dole ne mu hada kai domin kowane dan Najeriya ya yi alfahari da jami’o’inmu.”
Ya ce yajin aikin bai kamata ya wuce makonni biyu ba, “da majalisar dokokin kasar ta sa baki kafin yanzu.”
Shugaban Majalisar Wakilai, Femi Gbajabiamila, ya ce tsoma bakin da shugabannin majalisar suka yi ya yi tasiri.
Buhari zai sanar da matsayinsa kan yajin aikin ASUU
Gbajabiamila ya kuma ce ganawar da suka yi da Shugaban Kasa Muhammadu Buhari ta yi nisa.
Ya ce za a sanar da kungiyar da jama’a shawarar da shugaban kasar ya yanke a ranar 11 ga watan Oktoba.
Ya ce shugabannin majalisar sun samu damar tabbatar da cewa an samar da dukkan bukatun ASUU na farfado da albashi da sauransu a kasafin kudin 2023.
Ya ce an saka Naira biliyan 470 a cikin kasafin kudin 2023 domin biyan bukatar ASUU.
“Game da batun UTAS, kamar yadda gwamnati da ASUU suka amince, dukkansu za su zauna su amince da sanya duk wasu abubuwan da ASUU ke bukata a tsarin biyan albashi na IPPIS.
“Na yi imani tafiya ta yi nisa kuma shi ne ainihin abin da muka amince da shi.
“Da ASUU ta janye yajin aikin a yau, amma muna fata nan da kwanaki biyu masu zuwa za ta janye.
“Muna gode wa ASUU saboda amsa kira a duk lokacin da muka kira su.
“Mun hadu a ofishina, an samu kyakkyawan sakamako, kuma yana da kyau da muka yi hakan saboda dalibanmu,” in ji Gbajabiamila.
