✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Majalisar Dattawan Amurka ta amince a ba Ukraine tallafin Dala biliyan $12

Za a mika wa Joe Biden dokar domi ya aiwatar da ita

Majalisar Dattawan Amurka ta amince da dokar nan da za ta bai wa gwamnatin Joe Biden damar ware wa kasar Ukraine tallafin Dala biliyan 12.3 don karfafa mata ci gaba da yaki da Rasha.

Dokar ta samu amincewar majalisar ne bayan kuri’ar jin ra’ayi da sanatocin suka kada a ranar Alhamis, inda mutum 72 suka amince, 25 suka ce a’a.

Ana sa ran ita ma Majalisar Wakilan Amurka za ta bi sahu wajen amincewa da dokar kafin daga bisani a gabatar wa Shugaba Biden ya rattaba mata hannu.

Kazalika, dokar ta amince a debi Dala biliyan $3.7 daga kudin makaman Amurka a mika wa Ukraine.

Ko a farkon wannan shekarar, Amurka ta bai wa Shugaban Ukraine, Volodymyr Zelenskyy tallafin kudi na Dala biliyan 13.6 domin kara masa karfi a yakin da suke gwabzawa da Rasha.

Haka nan, Amurka ta sake tura wa Ukraine makudan kudi Dala biliyan $40 a matsayin tallafi sakamakon yakin da kasar ke yi da Rasha.