Wani magidanci ya lakada wa matarsa dukan kawo wuka har ta mutu saboda ta ki ba shi aron N2,000.
Mutumin da ke zaune da matarsa da ’ya’yansu uku a yankin Uselu a birnin Benin, Jihar Edo, ya dinga jibgar matar tasa, kafin daga bisa rai ya yi halinsa .
- ’Yan bindiga sun harbe mai juna biyu sun sace mijinta
- Ganduje zai biya wa dalibai 10,000 kudin jarrabawar NECO
Babban dan ma’auratan, mai shekara 13 ya shaida wa manema labarai cewa, “Mahaifinmu ya dawo gida da misalin karfe 9 na dare, sai ya nemi mahaifiyarmu ta ba shi aron kudi N2,000.
“Da ta nuna masa babu kudin, nan take ya hasala ya fara fadar bakaken maganganu cewar tana tozarta shi a duk lokacin da ya zo neman aron kudi wajenta.
“Lamarin ya kai ga ya yi mata dukan tsiya har ta fara rashin lafiya; Na yi kokarin ba ta magani amma ya zubar da maganin.
“Bayan makwabta sun shigo sai aka dauke ta zuwa asibiti, a can ne aka tabbatar da mutuwarta,” a cewar dan.
Yaron ya kuma bayyana cewa mahaifin nasu na dawowa gida cikin maye wanda a sanadin hakan yake huce haushinsa a kan mahaifiyarsu.
Wasu daga cikin makwabtan magidancin sun nuna damuwarsu a bisa halin rashin dattakonsa, yadda yake dukan matar tasa kusan a kullum.
Kakakin ’yan sandan Jihar Edo, SP Bello Kontongs, ya tabbatar da faruwar lamarin, sai dai bai yi karin bayani ba.
