Ministar Harkokin Mata ta warke daga cutar COVID-19 | Aminiya

Ministar Harkokin Mata ta warke daga cutar COVID-19

Pauline Tallen
Pauline Tallen
    Abubakar Muhammad Usman

Ministar Harkokin Mata a Najeriya, Pauline Tallen, ta warke daga cutar coronavirus bayan shafe kwanaki tana jinya.

Ministar ta bayyana haka ne ranar Litinin a Abuja, inda ta ja hankalin jama’a da su ci gaba kiyaye matakan kariya daga kamuwa da cutar.

Ministar ta yi godiya ga matan Najeriya da daukacin al’ummar kasar da suka taya ta da addu’ar samun waraka bayan an sanar da kamuwarta.

Misis Tallen, ta ce likita ya cewa ba ta dauke da cutar bayan gwajin da aka sake mata, kuma da ita aka yi bikin murnar shiga sabuwar shekarar 2021.

Ta ce za ta ci gaba mayar da hankali wajen kawo abubuwan cigaban mata a kasar nan, da kuma tallafa wa masu rauni da gajiyayyu.

Kazalika, Ministar tana fatan an shiga sabuwar shekarar da kafar dama tare da fatan samun zaman lafiya Najeriya.

A ranar 27 ga Disambar 2020 ne, Misis Tallen ta wallafa a shafinta na Twitter cewa ta harbu da cutar ta coronavirus.