Wata mata mai sana’ar sayar da burodi da danta da kuma karin wasu mutum biyu sun mutu bayan wani bene mai hawa uku ya rushe a unguwar Ebute-Metta da ke Jihar Legas ranar Lahadi.
Rahotanni sun ce an kuma samu nasarar ceto mutum 23 daga cikin baraguzan ginin.
- Wani abu kan Zakkatul Fidir da Sallar Idi
- NAJERIYA A YAU: Dalilin Da Ke Hana Mata Zuwa Masallacin Idi
Benen dai wanda ke kan titin Ibadan Street ya rushe ne wajen misalin karfe 9:30 na daren Lahadin, kuma ana zargin har yanzu akwai ragowar mutane a cikin shi.
Tuni dai jami’an Hukumar Kashe Gobara ta Jihar Legas da na takwararta ta ba da Agajin Gaggawa (LASEMA) suka dukufa aikin ceto a wajen.
Wata majiya ta ce ya zuwa lokacin hada wannan rahoton, an ceto akalla mutum tara.
A wani bidiyon iftila’in a kafafen sada zumunta, an ga dandazon mutane sun yi wa wajen kawanya.
A cewar Hukumar Bayar da Agajin Gaggawa ta Kasa (NEMA), yanzu haka an samu tono gawar mutum hudun, a daidai lokacin da ake ci gaba da aikin ceto.
