Tsohon babban limamin Masallacin Juma’a na unguwar ’yan majalisa da ke Apo a Abuja, Sheikh Nuru Khalid, ya ce ya samu sabon masallacin da zai ci gaba da jan sallah.
Sanarwar na zuwa ne a ranar da Kwamitin Masallacin na Apo ya sanar da sallamar shi gaba daya, bayan ya dakatar da shi tun da farko.
- 2023: Ganduje ya ki amincewa da ajiye aikin Shugaban KAROTA
- ’Yan sanda sun kama ’yan bindiga 5 a Jigawa
A karshen makon nan ne dai Kwamitin Masallacin, karkashin Sanata Sa’idu Dansadau ta fitar da sanarwar dakatar da malamin daga limancin saboda hudubarsa ta ranar Juma’a a kan matsalar tsaro.
To sai dai Sheikh Nuru ya ce tuni Kwamitin Gudanarwar sabon Masallacin Juma’ar da aka gina a unguwar ma’aikatan Babban Bankin Najeriya (CBN), ya ba shi limanci a can.
Ya ce zai fara jagorantar sallah ne daga ranar Juma’a, takwas ga watan Afrilun 2022 mai zuwa.
Ya ce, “Da yardar Allah zan fara jan sallah a sabon masallacina ranar Juma’ar nan mai zuwa, saboda a matsayinmu na limamai, dole sai mutum ya samu wajen da zai rika limanci.
“Akwai sabon masallacin da muka gina a bayan unguwar CBN, ni ne zan rika jan sallah a can,” inji shi.
Malamin dai ya bayyana sallamar da aka yi masa daga masallacin na Apo a matsayin kaddararsa, saboda ya fadi gaskiya.
A yayin hudubar tasa dai, malamin ya kalubalanci gwamnati mai ci kan yadda ya ce ta gaza magance matsalar tsaron da ya addabi al’umma, musamman ma a kan harin jirgin kasan da aka kai a tsakanin Abuja zuwa Kaduna a makon da ya gabata.
