Dakarun Kungiyar Tsaron Kawance ta NATO sun fara gudanar da wani gagarumin atisayen soji a kasar Norway.
Atisayen wanda aka yi wa take ‘Cold Response’, dakaru dubu 30 ne za su gudanar da shi daga kasashe 23.
- Dalilin da muka tsawaita yajin aikinmu da sati 8 – ASUU
- Matar DCP Abba Kyari ta yanke jiki ta fadi a kotu
Jiragen yakin sama kimanin 200 da kuma jiragen yakin ruwa 50 na cikin atisayen sojojin na kasashen kungiyar tsaro ta NATO, wanda zai kai har zuwa ranar 1 ga Afrilu kafin a kammala shi.
Matakin ya zo ne a daidai lokacin da duniya ta shiga zaman dar-dar sakamakon yakin da Rasha ta kaddamar kan Ukraine.
Lamarin na zuwa ne a yayin da Rasha ke ci gaba da kai hare-hare a sassan kasar, domin hana makwabciyar tata kasancewa mamba a NATO, da a yanzu ta kaddamar da atisayen soji.
A karshen makon da ya gabata dai Rasha ta tsananta hare-haren da take kai wa cikin Ukraine, wannan karo a bangaren Arewaci da kuma Yammacin kasar.
A halin yanzu alkalumma na cewa mutane 35 sun rasa rayukansu a daya daga cikin hare-haren jiragen yakin da suka kai barikin Lviv kusa da iyakar Ukraine da Poland.
