✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Ronaldo ya kafa tarihin zama dan wasa mafi yawan kwallaye a duniya

Ronaldo ya sha gaban J. Bican da Romario da Pele da Messi 759.

Dan wasan gaba na Manchester United da Portugal, Cristiano Ronaldo, ya kafa tarihin zama dan wasan da ya fi kowanne yawan jefa kwallaye a wasannin kwallo na duniya. 

Cristiano Ronaldo mai shekaru 37 ne ya ci dukkannin kwallaye 3 a wasan da Manchester United ta lallasa Tottenham da ci 3 da 2 a daren Asabar, lamarin da ya sa har yanzu United ke da kwarin gwiwar kasancewa a cikin kungiyoyi 4 na saman teburin gasar Firimiyar Ingila.

Kwallo ta biyu da Ronaldo ya ci wa United  ce kwallonsa ta 806 a sana’arsa ta kwallon kafa, kuma ita ce ta sanya shi ya zama kan gaba a hukumance a wajen cin kwallaye a duniya.

Ana saura minti 10 a tashi wasa ne dan wasan  na kasar Portugal ya saka wata kwallo da kai, wadda ita ce kwallonsa ta 807.

Bayan saka wannan kwallo a raga ce aka sauya Ronaldo, wanda magoya baya suka mike tsaye, su na masa jinjina a yayin da yake barin filin wasa.

Tuni dai Ronaldo ya zarce wadannan ‘yan wasa a wajen yawan kwallaye: J. Bican 805, Romario 772, Pele 767 da Messi 759.