Babban Shugaban Kungiyar Al’ummar Kabilar Ibo ta duniya, Ohaneze-Ndigbo, Farfesa George Obiozor, ya rasu.
Gwamnan Jihar Imo, Hope Uzodinma, ya ce Farfesa Obiozor, wanda tsohon jakandan Najeriya ga kasashen Amurka da Isra’ila ne, ya rasu ne sakamakon rashin lafiya.
A ta’aziyyarsa, ya ce, “A madadin gwamnati da al’ummar Jihar Imo, ni Gwamna Hope Uzodinma, ina sanar da rasuwar danmu, abin alfaharinmj, kuma Babban Shugaban Kungiyar Al’ummar Kabilar Ibo ta Ohaneze-Ndigbo, Farfesa George Obiozor.
“Mashahurin masanin, jakada, kuma dattijo mai kishin kasa Farfesa George Obiozor, ya rasu ne bayan takaitaccen rashin lafiya,” in ji sanarwar da gwamnan ya fitar a ranar Laraba da dare.
Ya ce sanarwar babban rashi ga al’ummar Jihar Imo, yankin Kudu maso Gabas da Najeriya da ma duniya.
A cewarsa nan gaba za a sanar da shirye-shiryen jana’iazar mamacin.
A watan Janairu 2021 ne kungiyar Ohaneze-Ndigbo ta zabi Farfesa George Obiozor a matsayin shugabanta a fadin duniya.
Rasuwarsa a ranar Laraba ta zo ne bayan rade-radin da aka yada a ranar Talata cewa ya kwanta dama.
