Akalla soja shida ne ake fargabar sun kwanta dama a wani sabon hari da Boko Haram ta tarwatsa sansanonin soji a yankin Tabkin Chadi a Jihar Borno.
Mayakan Boko Haram din sun yi ba-ta-kashi tare da jikkata sojoji da dama sannan suka kwashi makamai bayan da suka tarwatsa sojojin a sansanonin biyu a Karamar Hukumar Marte.
- Matashi ya kashe kansa ta hanyar yanke gabansa a Kano
- Miji ya lakada wa matarsa duka har ta sheka lahira
- Makarantar Kagara: Gwamnatin Neja ta rufe makarantun kwana
Majiyarmu ta tsaro ta ce, “daruruwan mayakan Boko Haram ne suka kawo harin; sojoji sun gwabza fada da su amma abin ya gagare su. Dakarun sun yi iya yinsu domin kare sansanonin nasu.”
Ta shaida wa Aminiya a ranar Laraba cewa zuwa lokacin wasu daga cikin sojojin da suka bazu ba su kai ga hadewa da sauran da suka koma Dikwa ba tun bayan harin.
Aminiya ta gano cewa harin da aka kai wa sansanonin sojin a garin Marye a safiyar Litinin shi ne irinsa na uku da kungiyar ta kai wa sojoji a Karamar Hukumar Marte a cikin wata daya.
Hakan kuma na faruwa ne duk da yawan sojojin da aka gairk a garin.
