✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Tahir Fadlallah: Mai otal din Tahir Guest Palace da ke Kano ya rasu

Dan asalin kasar Lebanon, ya bar wasiyya duk inda ya rasu a binne gawarsa a Kano

Allah Ya yi wa attajirin Kano kuma mai kamfanin Tahir Guest Palace, Tahir Fadlallah rasuwa a safiyar Juma’a.

Tahir Fadlallah wanda dan asalin kasar Lebanon ne, ya rasu ne yana da shekara 74 bayan ya yi fama da rashin lafiya.

Attajirin wanda ya shafe shekara 72 a Kano, ya rasu ne a wani asibiti da ke kasar Lebanon, inda aka yi jinyarsa.

A ranar Asabar ake sa ran isowar gawarsa Najeriya domin jana’iza da kuma binne ta a Kano.

Mai kamfanin na Tahir Guest Palace, ya bar wa iyalansa wasiyya cewa a binne gawarsa a Kano, ko a ina ya rasu.

Kafin rasuwarsa, ya kasance shugaban kungiyar ’yan kasar Lebanon mazauna Najeriya.

Ya rasu ya bar mata daya da ’ya’ya biyar da kuma cikoki 10.

A ranar 5 ga Fabrairu, 1948 aka haife shi a Beirut, babban birnin kasar Lebanon.

Bayan shekara biyu da haihuwarsa iyayensa suka dawo Kano da zama tare da shi.

A 2020, yana daga cikin mutum 81 da Gwamnatin Jihar Kano ta karrama saboda gudummawarsu ga ci gaban jihar.