✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Tottenham ta dauki Conte a matsayin sabon Kocinta

Kungiyar ta dauke shi ne bayan ta Kori Nuno Espirito Santo.

Kungiyar kwallon kafa ta Tottenham ta dauko Antonio Conte bayan ta sallami tsohon kocinta Nuno Espirito Santo wanda ya yi wata hudu kacal a kungiyar.

Conte, wanda tsohon kocin kungiyar Chelsea ne, ya bayyana farin cikinsa na dawo wa harkar ta kwallon kafa bayan barin kungiyar Inter Milan, inda ya lashe kofin Seria A a kakar bara.

A cewarsa, “Ina matukar farin ciki da dawowa horar da ’yan wasa, musamman ma a Gasar Firimiyar Ingila.

“Kungiyar Tottenham Hotspur kungiya ce babba wadda take da daya daga cikin manyan filin wasa na a zo a gani.

“A kakar bara aka so a daura wannan aure, amma bai yiwu ba, kasancewar lokacin ban jima da rabuwa da Inter Milan ba. Yanzu a shirye nake domin ciyar da kungiyar nan gaba.”

A lokacin da yake Chelsea, Conte ya lashe kofi biyu: Firimiyar Ingila da Kofin Kalubale na Ingila.

Ya sanya hannu a kwantiragin ne na tsawon wata 18.