✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Tsohon Minista, Bunu Sheriff, ya rasu

Ya taba zama Minista a ma’aikatu daban-daban zamanin mulkin Babangida.

Tsohon Minista a zamanin mulkin tsohon Shugaban Kasa, Janar Ibrahim Badamasi Babangida, Injiniya Bunu Sheriff ya rasu.

Ya rasu ne ranar Lahadi yana da shekara 74 a duniya.

Marigayin dai ya taba aiki a ma’aikatu daban-daban, ciki har da ta Tama da Karafa da Wutar Lantarki.

Bugu da kari, Injiniya Sheriff ya taba zama jakadan Najeriya a kasar Faransa.

Da yake tabbatar da rasuwar, Sakataren Zauren Dattawan Borno, Dokta Bulama Mali Gubio, ya bayyana kaduwarsa daga rasuwar.

“Mun kadu matuka da rashinsa, mutumin kirki ne, ko kwana biyu da suka wuce muna tare da shi a Fadar Shehun Borno, babu wanda ya san lokacin mutuwarsa ya kusa. Innalillahi Wa’Inna Ilaihi Raji’un.

“Rasuwarsa na zuwa ne jim kadan bayan ta wani dattijon, Alhaji Tijjani Bolori. Wannan babban rashi ne ga Jihar Borno da ma Najeriya baki daya. Allah Ya sa Aljanna ce makomarsu,” inji Dokta Bulama.