Rundunar ’yan sanda a Jihar Jigawa, ta sanar da fara gudanar da bincike kan wata mata da ake zargi da kashe mijinta bayan da wata sa’insa ta shiga tsakaninsu.
Rundunar ta ce ta samu rahoton aukuwar lamarin yayin da wani mutumin kauyen Karaftayi da ke Karamar Hukumar Dambatta ya shigar mata da korafi.
- Rundunar Sojin Najeriya ta gargadi Sheikh Gumi a kan tozarci
- Maganin gargajiya ya yi ajalin mutum 10 ’yan gida daya
Ta ce mutumin ya sanar da cewa ringima ta kaure a tsakanin mijin da matarsa, inda ake zargin matar da kwadawa mijin na ta tabarya.
Yayin zantarwarsa da sashen Hausa na BBC, Kakakin rundunar ’yan sandan Jihar, ASP Shitu Lawal Adam ya ce jami’ansu sun garzaya gida inda suka tarar da mijin yashe a kasa.
ASP Shitu ya bayan sun garzaya da shi Asibiti har ya fara karbar magani sai kuma rai ya yi halinsa.
Sai dai ya ce har yanzu basu iya gano musabbabin faruwar lamarin ba a yayin da suke ci gaba da bincike.
Kazalika, ya ce za a gurfanar da matar a gaban Kuliya da zarar sun kammala bincike.
