Ya kamata a kara wa Rasha takunkumai —Zelensky | Aminiya

Ya kamata a kara wa Rasha takunkumai —Zelensky

Shugaban Ukraine, Volodymyr Zelenskiy
Shugaban Ukraine, Volodymyr Zelenskiy
    Ishaq Isma’il Musa

Shugaban kasar Ukraine, Volodmyr Zelensky na neman a kaurace wa bankunan Rasha da ma karin wasu tsauraran takunkumai a ci gaba da mamayar da ta ke yi wa kasarsa.

Zelensky ya yi wannan kira ne a jawaban da ya gabatar wa mahalrta babban taron Tattalin Arziki na Duniya da aka fara a birnin Davos na kasar Switzerland.

Shugaban na Ukraine ya bukaci mahalarta kan su taimaka masa wajen kawo karshen yakin da Rasha ta kaddamar a kasarsa.

Shugaba Zelensky ya bukaci hakan ne a lokacin da ya yi jawabi ga mahalarta taron ta kafar bidiyo, inda ya ce yana son ganin kasashen sun dakatar da hulda da daukacin bankunan kasar Rasha.

Har wa yau, shugaban na son ganin an yanke duk wata huldar cinikayya da ake Rasha wanda hakan zai zama izina ga duk wata kasa da ke da shirin daukar irin wannan mataki, don ta san cewa ba za a raga mata ba.

A nasa ganin inda tun da farko an yi wa Rasha rubdugu da ba a kai ga halin da ake ciki ba a yanzu haka. Ana ci gaba da zargin Rasha da daukar fansa na dakatar da fitar da abinci daga kasar da ma ta Ukraine. Wanda ake ganin dole ne mahaltar wannan taron su lalubo hanyar warware matsalar.