Wani mutum ya rasu a sakamakon hadarin mota da ya yi da tsakar dare, inda motarsa ta shige karkashin wata babbar mota a Abuja.
Hatsarin ya faru ne a daren Talata inda motar mutumin kirar SUV ta shige karkashin babbar motar da ke tafiya a kan babban titin Kubwa da ke Abuja.
Wani dan sanda da ya shaida abin da ya faru ya ce nan take mutumin, wanda shi kadai ne a cikin motar ya ce ga garinku nan.
“Yana gudu ne sosai, a lokacin ni ina daga can wurin ina wa wasu mata kwatancen inda suke nema, sai muka ji kara, muna waigawa sai muka ga motar tasa ta shige karkashin babbar motar da ke tafiya.”
“An dauke gawar mamacin an sa ta a cikin wata motar daukar marasa lafiya,” inji shi.
