’Yan sandan sun damko wasu manyan masu laifi hudu da suka addabi Karamar Hukumar Iyara da ke Jihar Kogi.
Jami’an ’yan sandan rundunar Operation Puff Adder ne suka yi nasarar cafko masu laifin a yayin wani samame a karamar hukumar.
- An sako daliban Jami’ar Greenfield ta Kaduna
- Chelsea ta lashe gasar Kofin Zakarun Turai
- An cafke mai buga jabun kudi a wurin sayen rago
Masu laifin da ake zargin an kama su ne a ranar Alhamis, yayin da ’yan sanda suke gudanar da bincike a kan hanyar Iyamoye zuwa Kabba.
Rundunar ’Yan Sandan Jihar Kogi ta ce wadanda ake zargin sun kware ne wajen yin kwace, tare hanya, fashi da sauran manyan laifuka.
Kayayyakin da aka kwato a hannunsu sun hada da wata bindiga kirar hannu guda daya da babur kirar Bajaj guda daya.
Tuni aka fara gudanar da bincike kansu kafin a mika su kotu don yanke musu hukuncin da ya dace da laifinsu.
