Rahotanni daga Jihar Kebbi sun bayyana cewa ’yan bindiga sun kashe jami’an tsaro akalla 19 a wani hari da suka kai kauyen Kanya da ke cikin Karamar Hukumar Danko-Wassagu.
Harin ya faru ne kwana daya bayan da ’yan bindiga suka kashe ’yan sa kai 63 a yankin.
- Birtaniya ta kwace jirgin saman attajiri dan kasar Rasha
- Kamfanonin jirage sun dakatar da ayyuka kan tsadar mai
Maharan sun je ne a kan babura a lokacin da Mataimakin Gwamnan Kebbi ke ziyara a kauyen a ranar Talata.
Mataimakin Gwamnan Samaila Yombe Dabai, ya shaida wa BBC cewa dakarun tsaron sun fafata ne da maharan, amma bai fadi yawan jami’an da aka kashe ba.
Majiyar ta bayyana cewa cikin jami’an tsaron da ’yan bindigar suka kashe har da sojoji 13 da kuma ’yan sanda 5 baya ga dan sakai 1.
Bayanai sun ce maharan sun kuma sace kayan abinci da dabbobi.
