’Yan bindigar da suka sace mutane a jirgin kasan Abuja zuwa Kaduna sun fitar da hoton jaririyar da wata mai juna biyu daga cikin fasinjojin jirgin ta haifa a hannunsu.
Bayan wata daya da yin garkuwa da mutanen ne dai ’yan ta’addar suka fitar da hotunan mutanen, kusan su 60.
- Kauyakun Giwa: Yadda ’yan bindiga ke sheke ayarsu a watan Ramadan
- ’Yan bindiga sun fitar da hotunan fasinjojin jirgin kasan Abuja-Kaduna
Daga bisani a ranar Laraba suka fitar da hoton jaririyar da mai jegon ta haifa, tana barci a cikin majanyi.
Bayanai sun nuna a lokacin da aka yi garkuwa da su, matar da ta haihu a hannun ’yan bindigar, tana dauke da tsohon ciki wata takwas.
Ana zargin ’yan kungiyar Ansaru — wani bangare da ya balle daga kungiyar Boko Haram – ne suka yi garkuwa da matafiyan.
A ranar 28 ga watan Maris ne aka kai harin bom kan jirgin kasan da ya taso daga Abuja da misalin karfe 6:10 na yamma zuwa Kaduna.
A harin ne aka kashe mutum takwas, aka yi garkuwa da kimanin 60, ragowar fasinjojin kuma suka sha da kyar.
