Kwallon kafa wasa ne da ya yi fice a fadin duniya kuma daga cikin ’yan wasansa akwai masu daukar makudan kudade a matsayin albashinsu a duk mako.
A Najeriya akwai wasu shahararrun ’yan wasa kwallon kafa da ke daukar fiye da Naira miliyan 30 a matsayin albashinsu, a duk mako.
1. Victor Osimhen:
Osimhen dan wasan gaban Najeriya ne da ke murza leda a kungiyar Napoli da ke kasar Italiya, inda yake daukar £120,000, wanda ya yi daidai da Naira miliyan 67 a matsayin albashinsa a sati.
2. Kelechi Iheanacho:
Iheanacho na taka rawar gani a bana a kungiyarsa ta Leceister City da ke kasar Birtaniya.
Dan wasan yana daukar albashin £60,000 a duk sati, wato kimanin Naira miliyan 33.
3. Wilfred Ndidi:
Ndidi dan wasan tsakiya ne dan asalin Najeriya da ke taka leda a Leceister City a gasar Ingila.
Dan wasan ya yi fice, wanda ya sa kungiyarsa ke biyan shi £76,000, kimanin Naira miliyan 43 a duk mako.
Wadannan makudan kudade da ’yan kwallo ke dauka duk sati, ya sa mutane da dama ke tururuwar neman kungiyar da za ta dauke su musamman a kasashen Turai.
