✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

’Yan sanda sun cafke Abba Kyari sa’o’i bayan NDLEA ta ba da shelarsa

Kamen na zuwa ne bayan NDLEA ta ayyana nemansa ruwa a jallo.

’Yan sa’o’i bayan Hukumar Hana Sha da Fataucin Miyagun Kwayoyi ta Kasa (NDLEA) ta shelanta neman korarren dan sandan nan, DCP Abba Kyari, bisa safarar miyagun kwayoyi, ’yan sanda sun tabbatar da cafke shi.

 Jaridar Punch dai ta rawaito cewa an cafke shin ne tare da wasu mutum hudu da ake zargi a ranar Litinin.

Abba Kyari kuma yanzu haka na fuskantar bincike bayan wani rahoto na Hukumar Bincike ta Amurka (FBI) ya zarge shi da hannu a zargin da ake yi wa wani dan damfara ta intanet, Hushpuppi.

NDLEA ta ayyana Mataimakin Kwamishinan ’Yan Sandan a matsayin wanda take nema ruwa a jallo bisa zargin harkalla ta miyagun kwayoyi.

Kakakin Hukumar NDLEA, Mista Femi Babafemi ne ya sanar da hakan a wani taron manema labarai da ya gudana ranar Litinin a Abuja.

Majiyar mai tushe daga Hukumar NDLEA ta ce bincike ya nuna cewa DCP Kyari daya daga cikin ’ya’yan wata babbar kungiya ta kasa-da-kasa da ke hada-hadar miyagun kwayoyi a fadin duniya.

A watan Yulin bara ne Rundunar ’yan sandan Najeriya ta dakatar da Abba Kyari daga aikin dan sanda sakamakon zargin karbar na goro da Hukumar Binciken Manyan Laifuka ta Amurka FBI ke yi masa.