Jami’an tsaro sun aika wasu ’yan bindiga lahira a yayin da suke shirin kai hari a Karamar Hukumar Lere ta Jihar Kaduna.
Kakakin ’yan sandan Jihar, Mohammed Jalige ya ce, makaman da aka kwace a hannun maharan sun hada da bindigogi biyar kirar AK-47 da wasu uku kirar G-3 da harsasai kusan 1,700 da mota kirar Golf 3.
- Aisha Buhari ta dawo Najeriya bayan wata shida a Dubai
- Masunci ya kama kifi mai fuskar mutum
- Rufe iyakoki bai hana fasakwaurin makamai ba —Buhari
- Majalisar Malamai ta nemi Ganduje ya cire wa Abduljabbar takunkumi
Ya ce, “Bayan samun bayanan sirri cewa ’yan bindigar na shirin kai hari, hadin gwiwar jami’an tsaro sun ritsa ’yan bindigar ne a garin Saminaka.
“Da jin alamun jami’an tsaro sai suka fara harbi, nan take ’yan sanda suka mayar da martani suka bindige biyu daga cikinsu, sauran kuma da aka harba suka jefar da makamansu suka tsere zuwa cikin daji.”
Ya ce an kai gawarwakin ’yan bindigar Asibitin Kwararru na Barau Dikko da ke garin Kaduna, ana kuma ci gaba da bincike don damko sauran.
“Muna rokon jama’a su taimaka da rahoton duk wanda aka gani da raunin harbi, da kuma bayanan da za su taimaka wajen magance matsalar tsaro a fadin jihar,” inji shi.
