✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Za a yi wa Janar-Janar 30 ritaya bayan nada Faruk Yahaya

’Yan aji na 35 da 36 da suka rage a bakin aiki za su fuskanci riyata.

Masu mukamin Janar dain soja kimanin 30 ne za su yi ritaya bayan nada Manjo-Janar Faruk Yahaya a matasyin Babban Hafsan Sojin Kasa na Najeriya.

Janar-Janar din da hakan za ta shafa su ne daliban Kwalejin Horas da Kananan Hafsoshin Soji (NDA) ’yan aji na 35 da aji na 36 kasancewar Manjo-Janar Faruk Yahaya dan aji na 37 —na baya da su ne.

Bisa al’adar soji, a duk lokacin da aka nada wani Janar a matsayin Babban Hafsan Soji, akan yi wa wadanda ke gaba da shi ritaya.

A ranar Alhamis, 27 ga Mayu, 2021, Shugaba Buhari ya nada Faruk Yahaya a matsayin Babban Hafsan Sojin Kasa bayan rasuwar Laftanar-Janar Ibrahim Attahiru wanda ke rike da mukamin.

Ranar Juma’a, 21 ga watan ne Attahiru da wasu Janar-Janar uku suka rasu a hatsarin jirgin sama tare wasu hafsoshi da jami’an soji a yayin ziyarar aiki a Kaduna, aka kuma yi jana’izarsu su 11 a ranar Asabar.

Hasashen nadi Babban Hafsan Soji

Nadin Faruk da Mukaddashin Daraktan Yada Labaran Hedikwatar Tsaro, Birgediya Onyema Nwachukwu ya sanar ta kawo karshen rade-radin wasu sunaye da ake cewa a cikinsu Buhari zai ba wa mukamin.

Da farko an yi hasashen za a nada Daraktan Tsara-tsare na Rundunar Sojin, Manjo-Janar Benjamin Ahanotu a matsayin sabon Babban Hafsan Sojin Kasan, kasancewarshi dan aji na 35 —ajinsu a marigayi Attahiru.

Bayan nada Faruk, majiyoyi a Rundunar sun ce hakan zai iya tilasta a yi wa Janar-Janar akalla 30 ’yan aji na 35 da 36 ritaya.

Akalla hafsoshi 28 ’yan aji na 35 ne suka rage a halin yanzu a Rundunar, ciki  har da Manjo-Janar Sagir Yaro, wanda a kwanan aka nada shi Kwamandan NDA.

Majiyarmu ta soji ta ce karin girman da aka yi wa Faruk zuwa matasyin Manjo-Janar a 2017 ya sa ya sha gaban mutum takwas ’yan aji na 36.

‘Ana iya barin wasu’

An kuma gano cewa duk da cewa za a yi wa yawancin ’yan aji na 35 da 36 ritaya, Janar Faruk na iya rike wasu daga cikinsu, domin amfana da kwarewarsu musamman wajen yaki da Boko Haram a yankin Arewa-maso-Gabas.

“Aji na 34 sun riga sun tafi, marigayi Attahiru kuma dan aji na 35 ne.  Akwai yiwuwar yi wa Janar-Janar 30 ritaya; biyu daga cikinsu ’yan aji na 35 ragowar 28 kuma ’yan aji na 36.

“Amma sabon Babban Hafsan Sojin Kasan na da damar barinsu. Zai so ’yan ajinsu su kasance a zagaye da shi. Saboda haka wasu za a sauya musu wurin aiki zuwa Hedikwatar Tsaro,” inji majiyar.

 

Wane ne Janar Faruk Yahaya?

A haifi Faruk Yahaya ne a ranar 5 ga Janairu, 1966 a garin Sifawa na Karamar Hukumar Bodinga ta Jihar Sakkwato.

A 1985 ya shiga Kwalejin Horas da Kananan Hafsoshin Soji (NDA) a matsayin dan aji na 37.

An yaye shi daga NDA a matsayin Laftanar a ranar 22 ga Satumba, 1990.

Ya yi karatun digirinsa na farko ne a fannin Tarihi, digiri na biyu kuma a kan Harkokin Siyasar Kasashen Duniya da Difilomasiyya.

Karin girma:

  1. Kwanan watan karin girman da ya samu kuma su ne:
  2. Laftanar – 27 ga Satumba, 1990
  3. Kyaftin – 27 ga Satumba, 1994
  4. Manjo – 27 ga Satumba, 1998
  5. Laftanar Kanar – 27 ga Satumba, 2003
  6. Kanar – 27 ga Satumba, 2008
  7. Birgediya – 27 ga Satumba, 2013
  8. Manjo-Janar – 27 ga Satumba, 2017.

Mukaman da ya rike:

A tsawon lokacin Faruk Yahaya ya rika mukamai daban-daban.

  1. Kafin sabon mukaminsa shi ne Kwamandan Rundunar Operation Hadin Kai mai yaki da kungiyar Boko Haram; Ya kuma taba rike
  2. Babban Kwamandan Rundunar Sojin Kasa ta 1
  3. Kwamandan Rundunar Operation Lafiya Dole mai yaki da Boko Haram
  4. Kwamandan Rundunar Guards Brigade mai tsaron Fadar Shugaban Kasa
  5. Darekta a Kwalejin Hafsoshin Soji ta AFCSC da ke Jaji
  6. Darketa a Hedikwatar Rundunar Sojin Kasa
  7. Shugaban Ma’aikatan Rundunar Operation Pulo Shield da ta yaki ’yan taratsin Neja Delta
  8. Mataimakin Darektan Bincike da Cigaban Rundunar Sojin Kasa
  9. Sakataren Rundunar Soji Kasa
  10. Mataimakin Sakataren Rundunar Sojin Kasa
  11. Kwamandan Rundunar Operation Clean Sweep a yankin Birnin Gwari.

Manjo-Janar Faruk Attahiru ya kuma samu lambobin yabo masu yawa a lokuta daban-daban.

 

Daga Sagir Kano Saleh da Idowu Isamotu, Saawua Terzungwe da Abubakar Auwal (Sakkwato)