Jami’an tsaro sun hallaka ’yan bindiga 161 a cikin wata shida a Jihar Kaduna.
Gwamnatin jihar, ta ce a cikin wata shidan da suka gabata, ’yan bindiga sun yi garkuwa da akalla mutum 1,789 a sassan jihar.
Kwamishinan Tsaro da Harkokin Cikin Gida na Jihar Kaduna, Samuel Aruwan, ya ce jami’an tsaron sun kashe ’yan bindiga 59 a tsakanin watan Afrilu zuwa Yulin 2022.
Rahoton yanayin tsaron jihar na wata shida da ya gabatar ranar Juma’a ya ce an kashe mutum 285 a sassan jihar, sakamakon ayyukan ’yan bindiga da rikicin kabilanci da sauransu.
Ya ce daga watan Yuli zuwa Satumba kuma an yi garkuwa da mutum 804 a jihar, wadanda 508 daga cikinsu an sace su ne a yankin Mazabar Kaduna ta Tsakiya.
Ya ce a jami’an tsaro sun kashe ’yan bindiga 109 a musayar wuta daga watan Yuli zuwa Satumba.
Kwamishinan tsaron ya ce a cikin wata ukun, an sace shanu 1,133, kuma mutum 654 da ake zargi sun shiga hannu.
