Majalisar Harkokin Dan Sanda ta tabbatar da Usman Alkali Baba a matsayin cikakken Babban Sufeton ’Yan Sandan Najeriya.
An tabbatar da nadin nasa ne a zaman Majalisar da Shugaban Kasa Muhammadu Buhari ya jagoranta a ranar Juma’a.
Ministan Harkokin ’Yan Sanda, Muhammad Maigari Dingyadi, ya ce Buhari ya umarci Shugaban ’Yan Sandan ya tabbatar da ganin an samu gabala a kan matsalar tsaro da ke ci wa Najeriya tuwo a kwarya.
Dingyadi ya ce Majalisar ta amince da nadin ne bisa la’akari da nasarorin sabon Sufeto Janar din ya samu da kuma gogewarsa ta aiki.
A ranar 6 ga Afrilu ne Shugaban Buhari ya amince da nadin Usman Baba a matsayin mukaddashin Shugaban ’Yan Sanda.