Jami’ar Benin za ta fara bincike kan sarrafa makamin Nukiliya a Najeriya | Aminiya

Jami’ar Benin za ta fara bincike kan sarrafa makamin Nukiliya a Najeriya

Makamin Nukiliya
Makamin Nukiliya
    Rahima Shehu Dokaji

Jami’ar Benin ta ce za ta hada gwiwa da Cibiyar Binciken Makamin Nukiliya ta Turai (CERN) domin fara bincike a fannin kimiyya da fasahar Nukiliyar a Najeriya.

Sashen yada labarai na jami’ar  ne ya tabbatar da hakan a cikin wata sanarwa da ya fitar.

Sanarwar ta ce wasu daliban makarantar su biyu, Decent Oghifo da David Dosu da a kwanakin baya suka sami nasarar tsallake tantancewar da cibiyar ta CERN za su je hedkwatarta da ke Geneva domin daukar wani kwas da ta shirya.

Kamar yadda sanarwar ta bayyana, wannan ne karo na farko da dalibai daga yankin Kudu da hamadar Sahara suka sami matsuguni a shirin.

Jami’ar ta kuma ce Daraktan sashen bincike da Ci gaban Jami’ar, Farfesa Musibau Bamikole, ya gabatar da daliban ga Shugaban Jami’ar Farfesa Lilian Salami, da kuma sauran shugabnnin gudanarwarta.

A nasa bangaren, Shugaban jami’ar ya bayyana farin cikinsa kan wannan nasara da daliban da ma jami’ar suka samu, tare da ayyana hadin guiwar jami’ar da cibiyar CERN a matsayin babban ci gaba da zai sake daga darajar jami’ar a Najeriya da idon duniya.