Jagoran Jam’iyyar APC na Kasa, Bola Tinubu, ya yi ganawar sirri da tsohon Gwamnan Jihar Kano, Malam Ibrahim Shekarau.
Tinubu da Sanata Shekarau sun sa labule ne kwana kadan bayan rikicin shugabancin jam’iyyar APC a Jihar Kano ya dauki sabon salo.
- Ba mu da hannu a kone ofishin Sanata Barau —APC
- ’Yan daba sun cinna wa ofishin Sanata Barau Jibrin wuta a Kano
An yi ganawar ce a gidan Tinubu da ke Legas, duk da cewa kawo yanzu babu bayani game da abin da suka tattauna.
Gabanin ganawarsa da Malam Ibrahim Shekarau, Tinubu ya yi irin wannan ganawa da Gwamnan Kano, Abdullahi Ganduje a kwanakin baya.
Bangaren Ganduje da na Sanata Shekaru dai na zaman doya da manja, har ta kai ga kowannensu ya zabi shugabanninsa daban, a lokacin zaben shugabannin jam’iyyar a matakin jiha.
A makon da ya gabata ne dai kotu ta tabbatar da Ahmadu Haruna Zago wanda bangaren Shekarau a matsayin halastaccen Shugaban Jam’iyyar APC na Jihar Kano.
Jihar Kano ita ce jam’iyyar APC ta fi rinjaye a Najeriya kuma idanta da na sauran jam’iyyu na kan jihar domin samun ruwan kuri’u.
