✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto

United ta casa Bournemouth, Everton ta ji jiki a gida

Arsenal dai ta ci gaba da zama daram a teburin Firimiyar ta Ingila.

A gasar Firimiyar Ingila, kungiyar Manchester United ta ci gaba da jan zarenta tun bayan dawowa daga hutun Gasar Kofin Duniya da aka fafata a Gabas ta Tsakiya.

Manchester United dai a yanzu ta yi zaman dabaro a mataki na hudu, bayan doke Bournemouth a Old Trafford 3-0 ranar Talata.

Luke Shaw da Casemiro da kuma Rashford ne suka ci kwallayen.

Ita kuwa Arsenal dai ta ci gaba da zama daram a teburin Firimiyar ta Ingila, bayan kurman duro da ta yi da Newcastle.

An buga wasan ne a filin Gunners na Emirates, kuma a karon farko a kakar bana Arsenal ta gaza cin wasa a gida.

A sauran wasannin da aka yi karon battar a ranar Talata, Leicester City dai ta yi rashin nasara har gidanta na King Power a hannun Fulham da ci daya mai ban haushi.

To amma a duk cikin wasannin, Everton ce ta fi jin jiki, bayan da Brighton ta sharara mata hudu a Goodison Park.

An tashi wasan 4-1, kuma ita ce rashin nasara ta uku da Everton ta yi jere a gidanta.

Hakan ya kara saka matsin lamba ga kocin kungiyar Frank Lampard, wanda ya ci wasa daya a cikin tara a bana.