’Yan bindiga sun kashe wani soja da wani jami’in Rundunar Tsaro ta Sibil Difens (NSCDC) a wani hari da ’yan bindigar suka kai wani sansanin soji a Jihar Katsina.
Wani ganau ya shaida mana a ranar Alhamis cewa dandazon maharan da suka kai harin da misalin karfe 10 na dare, sun bude wuta babu kakkautawa a kan sansanin da ke yankin Shimfida a Karamar Hukumar Jibia ta jihar.
- Kashi 90 cikin 100 na gwamnoni ba su cancanci shugabanci ba
- Iyaye sun yi wa malamin dansu dukan tsiya
Ya kara da cewa jami’an tsaron da aka raunata a harin suna asibiti ana ba su kulawa.
Mai Magana da Yawun Hukumar NSCDC a Jihar Katsina, DSC Muhammad Abdara, ya tabbatar da rasuwar jami’in hukumar a harin, amma ba mu samu sojoji ba domin ji daga bangarensu.
Idan ba a manta ba, a watan Satumban 2021, ’yan bindiga sun yi wa ayarin wasu sojoji kwanton bauna a yankin inda suka kashe soja uku suka kuma jikkata wasu da dama.
