’Yan bindiga sun kashe Hakimin Kauyen Riruwai da ke Gundumar Lame a masarautar Bauchi a Karamar Hukumar Toro a Jihar Bauchi, Alhaji Garba Badamasi.
Aminiya ta ruwaito cewa tun da farko wasu ‘yan bindiga ne da suka kai hari tare da yin garkuwa da shi a ranar Juma’a, 15 ga watan Maris, 2024.
- An shiga rudani yayin da gwamnatin Kano ta ci gaba da rusau
- Abubuwan da ba a sakaci da su a Ramadan —Sheikh Daurawa
Wata majiya da ta nemi a sakaya sunanta, ta ce ‘yan bindigar sun shiga fadar marigayin kai tsaye, inda suka yi awon gaba da shi.
Majiyar ta ce marigayin ya shafe kwana daya a hannun ’yan bindigar kafin daga bisani suka kashe shi tare da jefar da gawarsa a kan hanyar kauyen.
Bayan tsintar gawar tasa a ranar Lahadi, an yi masa jana’iza kamar yadda addinin Musulunci ya tanadar.
Daya daga cikin masu sarautar gargajiya na kauyen ya tabbatar da faruwar lamarin.
Kokarin jin ta bakin kakakin rundunar ’yan sandan jihar, SP Ahmed Wakili, ta ci tura domin bai amsa kiran da aka masa ba.
