Tsohon wakilin Nasarawa ta Yamma a zauren Majalisar Dattawa, Sanata Abubakar Danso Sodangi ya riga mu gidan gaskiya.
Wata majiya daga danginsa, ta tabbatar da rasuwar Sanata Sodangi a zantawar da ta yi da wakilinmu ta wayar tarho daga birnin Lafiya na Jihar Nasarawa a ranar Litinin.
Majiyar wadda ta bukaci a sakaya sunanta, ta ce Sanatan ya rasu ne da tsakar dare wayewar garin yau Litinin a Babban Asibitin Garki da ke Abuja.
A cewarta, kafin rasuwarsa, marigayin ya yi fama da jinya da ta danganci ciwon koda.
Bayanai sun ce tsohon Sanatan ya rasu bayan shafe shekaru 70 a doron kasa.
