Ya kamata Majalisar Tarayya ta hana bara a kan tituna —Ganduje | Aminiya

Ya kamata Majalisar Tarayya ta hana bara a kan tituna —Ganduje

Gwamnan Jihar Kano, Abdullahi Umar Ganduje
Gwamnan Jihar Kano, Abdullahi Umar Ganduje
    Abdullahi Abubakar Umar

Gwamna Abdullahi Umar Ganduje na Jihar Kano, ya ce lokaci ya yi da ya kamata Majalisar Tarayya ta hana barace-barace a ko’ina a fadin kasar nan.

Gwamnan wanda ake yi wa lakabi da Khadimul Islama, ya koka kan yadda iyaye ke tura ’ya’yansu yawon barace-barace a kan tituna, lamarin da ya ce hakan rashin imani ne.

Wannan kira na Ganduje na zuwa ne a yayin Taron Kasa karo na biyu da Tsangayar Ilimi ta Jami’ar Bayero Kano ta shirya, inda ya ce ya kamata Majalisar Tarayya ta kafa wata doka da za ta hana mabarata yawo a duk wani kwararo da sako a kasar.

A cewarsa,  “ya kamata dokar ta tilasta wa iyaye da wadanda nauyin kula da ’ya’ya ya rataya a wuyansu su rika sanya ’ya’yansu a makaranta.”

Ya kara da cewa, “matsalar tsaro da ayyukan ta’addanci da ake fuskanta a kasar nan na da nasaba da rashin neman ilimi musamman a yankin Arewa maso Gabas da wasu jihohi a Arewa maso Yammacin kasar.”